.....................
Download WordPress Themes, Happy Birthday Wishes
HTV Pakistan
بنیادی صفحہ » خبریں » شام کا ترک فوج کیخلاف جوابی کارروائی کا اعلان، فوج روانہ

شام کا ترک فوج کیخلاف جوابی کارروائی کا اعلان، فوج روانہ

پڑھنے کا وقت: 2 منٹ

شام نے ترکی کے حملوں کا مقابلہ کرنے کے لیے شمالی حصے میں اپنی فوجی دستے روانہ کردیے ہیں۔

ایچ ٹی وی پاکستان نے شامی سرکاری نیوز ایجنسی کے حوالےسے خبر دی ہے کہ شامی فوجی ترک حملوں کا مقابلہ کرنے کے لیے شمالی حصے کی جانب روانہ ہوگئے ہیں۔

یہ رپورٹ ایسے وقت میں سامنے آئی جب ایک کُرد عہدیدار نے کہا تھا کہ ’ کردوں اور شامی حکومت کے درمیان مذاکرات جاری ہیں‘۔

کُرد عہدیدار نے کہا تھا کہ ’ ترکی کی جانب سے حملوں کے پیش نظر تمام آپشنز کا جائزہ لیا جارہا ہے، دمشق حکومت اس جارحیت کا مقابلہ کرنے کے لیے اپنی ذمہ داریاں سنبھالے۔

گزشتہ روز شام کے شمالی علاقوں میں انقرہ کے حملوں کے پانچویں روز امریکا کی جانب سے ایک ہزار فوجیوں کے انخلا کے اعلان کے بعد ترک فورسز نے شام میں مزید پیش قدمی کی تھی۔

ترک حمایت یافتہ فورسز نے بین الاقوامی سطح پر انقرہ کی جانب سے آپریشن پر تنقید کے باجود گزشتہ روز سرحد پر اہم پیش قدمی کرتے ہوئے لڑائی جاری رکھی۔

خیال رہے کہ شام کے شمالی حصے میں حالیہ حملوں میں جنگجوؤں اور شہریوں سمیت درجنوں افراد ہلاک اور لاکھوں افراد بے گھر ہوگئے ہیں۔

شمالی علاقے میں موجود کُرد انتظامیہ نےکہا کہ بے گھر افراد کے کیمپ کے قریب ترکی کی بمباری کے نتیجے میں داعش سے وابستہ افراد کے 800 کے قریب رشتہ دار فرار ہوگئے۔

خیال رہے کہ کُرد حکام اور غیر ملکی طاقتوں نے بارہا خبردار کیا ہے کہ ترکی کے حملوں کے نتیجے میں داعش کے خلاف جنگ متاثر ہوسکتی ہے اور جہادیوں کو قید سے آزادی مل سکتی ہے۔

شامی مبصر گروپ برائے انسانی حقوق نے کہا کہ گزشتہ روز شام کے شمال مشرقی علاقے میں شہریوں اور صحافیوں پر مشتمل گاڑیوں پر ترک فضائی حملے میں 26 شہری ہلاک ہوئے جن میں ایک صحافی بھی ہے جس کی شناخت نہیں ہوسکی۔

ترک حملوں میں اب تک شامی سرحد پر کم از کم 60 شہری ہلاک ہوچکے ہیں جبکہ ترک رپورٹس کے مطابق ترکی کی جانب کردوں کی شیلنگ کے نتیجے میں 18 افراد ہلاک ہوئے۔

مبصر گروپ نے کہا کہ انقرہ کے حمایت یافتہ جنگجووں نے 2 روز قبل شام کے قصبے تل ابیض میں 9 شہریوں کو پھانسی دے دی تھی۔

کُرد انتظامیہ کے مطابق جن شہریوں کو قتل کیا گیا ان میں کردش جماعت کی عہدیدار اور ان کا ڈرائیور بھی شامل تھا۔

دوسری جانب امدادی تنظیموں نے خبردار کیا ہے کہ اگر ترک حملے نہیں روکے گئے تو 8 برس سے جنگ کا شکار ملک شام میں ایک اور انسانی بحران جنم لے سکتا ہے۔

کرد جنگجو شام میں امریکی اتحادی تھے اسی لیے ٹرمپ کے اچانک فیصلے کو واشنگٹن میں اپنے اتحادیوں سے دھوکے سے تعبیر کیا گیا۔

ٹرمپ کے فیصلے کو کرد جنگجوؤں نے بھی ‘پیٹھ میں چھرا گونپنے’ کے مترادف قرار دیا تھا، تاہم امریکی صدر نے اس تاثر کو رد کردیا۔

واضح رہے کہ اسلامی جمہوریہ ایران، سعودی اور دیگر ممالک نے شام پر ترک فوج کے حملوں کی مذمت کی ہے اور ترکی سے مطالبہ کیا ہے۔

ترکی کا کئی برسوں سے یہ موقف ہے کہ شام میں موجود کرد جنگجو ‘دہشت گرد’ ہمارے ملک میں انتہا پسند کارروائیوں میں ملوث ہیں اور انہیں کسی قسم کا خطرہ بننے سے روکنا ہے۔

ترک صدر رجب طیب اردوان نے چند روز قبل فوج کو کرد جنگجوؤں کے خلاف آپریشن کی اجازت دیتے ہوئے کہا تھا کہ اس کا مقصد ترکی کی جنوبی سرحد میں ‘دہشت گردوں کی راہداری’ کو ختم کرنا ہے۔

جواب لکھیں

آپ کا ای میل شائع نہیں کیا جائے گا۔نشانذدہ خانہ ضروری ہے *

*